नेपालमा विद्युत् विकासको इतिहास केवल जलविद्युत आयोजना निर्माणको कथा मात्र होइन, यो पनि लाखौँ नागरिकको उज्यालोप्रतिको चाहना, समुदायको सहभागिता र राज्यसँगको सहकार्यको इतिहास हो । आज देशका अधिकांश घरधुरीमा विद्युत् सेवा पुगेको छ । विद्युतको प्रयोग केवल बत्ती बाल्नमा मात्र सीमित छैन; शिक्षा, स्वास्थ्य, सञ्चार, कृषि, उद्योग, व्यापार, सूचना प्रविधि, विद्युतीय चुल्हो र विद्युतीय सवारी साधनसम्म यसको प्रयोग विस्तार भइसकेको छ ।
ऊर्जा आज विकासको मेरुदण्ड बनेको छ । तर केही दशकअघि नेपालको ग्रामीण यथार्थ बिल्कुल फरक थियो । सहरका सडक र घरहरू झिलिमिली हुँदा गाउँका नागरिकका लागि त्यो केवल एउटा सपना जस्तै थियो । गाउँका मानिसहरू सहर पुग्दा उज्यालोमा बित्ने जीवन देख्थे र आफ्नै गाउँमा पनि त्यही उज्यालो ल्याउने आकाङ्क्षा बोकेर फर्किन्थे । त्यो चाहना स्वाभाविक थियो, तर त्यसलाई पूरा गर्न आवश्यक पूर्वाधार, लगानी र राज्यको पहुँच सीमित थियो ।
