राजनीति पहाडबाट झरेको झरना जस्तै शुद्ध, स्वच्छ र जीवनदायी हुनुपर्ने क्षेत्र हो । पहाडको टुप्पोबाट निस्केको झरना जति स्वच्छ हुन्छ, तल बग्दै जाँदा त्यही शुद्धताले गाउँ, खेत, बस्ती र जीवनलाई सिञ्चित गर्छ । राजनीति पनि त्यसै गरी मूल तहमा शुद्ध भए मात्र समाज, राज्य र नागरिकको जीवनलाई ऊर्जाशील बनाउन सक्छ । झरनाको मुहानमै फोहोर मिसियो भने तलसम्म पुग्दा त्यो पानी रोगको कारण बन्छ । आजको राजनीति पनि धेरै हदसम्म त्यही अवस्थाबाट गुज्रिरहेको छ ।
राजनीतिको मूल उद्देश्य सेवा, सुशासन र जनहित हो । जब स्वार्थ, लोभ, सत्तामोह र अवसरवादले राजनीति कब्जा गर्छ, तब यो जनताको भरोसा गुमाउने माध्यम बन्छ । शुद्ध राजनीति भनेको सत्य बोल्ने साहस, गलतका विरुद्ध उभिने आँट र जनताप्रतिको इमानदार प्रतिबद्धता हो । यो कुनै व्यक्ति वा दलको निजी सम्पत्ति होइन, साझा जिम्मेवारी हो । राजनीतिमा प्रवेश गर्ने हरेक व्यक्तिले आफैँलाई झरनाको मुहान जस्तै स्वच्छ राख्न सक्नु पर्छ ।
